بچوں کوویکسین کی فراہمی یقینی بنانےکیلئےپرعزم :پٹیل

اسلام آباد : وفاقی وزیر صحت عبدالقادر پٹیل نے کہا ہے کہ حکومت محفوظ اور موثر ویکسین کی فراہمی کو یقینی بنانے کیلئے پرعزم ہے۔ویکسی نیشن بیماریوں کے خلاف ایک محفوظ اور مؤثر طریقہ ہے۔

گزشتہ روز وزارت صحت سے جاری بیان کے مطابق وفاقی وزیر نے کہا کہ وزارت صحت بچوں کو بیماریوں سے محفوظ رکھنے کیلئے عملی اقدامات کو یقینی بنارہی ہے۔ وفاقی وزیرنے تمام والدین پر زور دیاکہ اپنے 2سال سے کم عمر کے بچوں کو12مہلک بیماریوں سے بچائو کے ٹیکے ضرور لگوائیں۔ انہوں نے کہا کہ حکومت حفاظتی ٹیکہ جات کی کو ریج کو سو فیصد یقینی بنانے کیلئے پر عزم ہے۔

انہوں نے کہا کہ دوردراز اور پسماندہ علاقوں کی ویکسی نیشن کی رسائی میں فرنٹ لائن ورکرز کا اہم کردار ہے۔ انہوں نے کہا کہ پولیو آج بھی بہت سے بچوں کے مستقبل کیلئے خطرہ ہے ۔

عالمی ہفتہ برائے حفاظتی ٹیکہ جات کے دوران بچوں تک پولیو سے بچائو کے حفاظتی قطروں کی رسائی کو یقینی بنائیں۔انہوں نے کہا کہ ملک بھر میں 24سے 30 اپریل تک عالمی ہفتہ برائے حفاظتی ٹیکہ جات منایا جارہاہے جو وزارت صحت ،تمام صوبوں اور دیگر سٹیک ہولڈرز کے تعاون سے منایاجا رہا ہے۔