رمضان:پنجاب میں غرباکو مفت آٹا ملے گا،وزیراعظم کی ہدایت پرپیکج تیار
Share
اسلام آباد ، لاہور: وزیراعظم شہباز شریف کی ہدایت پر حکومت پنجاب نے مہنگائی کے ستائے غریب عوام کیلئے بڑا رمضان پیکج تیار کیا ہے جس کے تحت غریب گھرانوں کو مفت آٹا فراہم کیا جائے گا۔
یہ فیصلہ وزیراعظم کے زیر صدارت پنجاب میں رمضان پیکج کے تحت مفت آٹے کی فراہمی کے جائزہ اجلاس میں کیا گیا۔پہلےمرحلے میں پنجاب میں غریب ترین لوگوں کوخصوصی رمضان پیکج کے تحت مفت آٹا فراہم کیا جائے گا۔
وزیراعظم نے غریب گھرانوں کو رمضان پیکج کے تحت آٹے کی فراہمی پر جامع حکمت عملی جلد از جلد مکمل کرنے کی ہدایت کرتے ہوئے کہا ماہ رمضان میں روزہ داروں کو زیادہ سے زیادہ ریلیف دیا جائے۔
پنجاب ماڈل کی طرز پر ملک بھر میں رمضان پیکج کی غریب عوام کو فراہمی کیلئے وفاق صوبوں کو ہر ممکن تعاون فراہم کرے گا۔
اجلاس میں چیف سیکرٹری پنجاب زاہد اختر زمان اور سیکرٹری خزانہ مجاہد شیر دل نے رمضان پیکج کے حوالے سے وزیر اعظم کو بریفنگ دی۔
نگران وزیراعلیٰ پنجاب محسن رضا نقوی کے علاوہ سیکرٹری فوڈ اور دیگر اعلی حکام بھی اجلاس میں شریک ہوئے۔