سعودی عرب عالمی نمائش 2030کی میزبانی کیلئے مضبوط امیدوار

ریاض : بین الاقوامی نمائش بیورو(بی آئی ای)کے سیکرٹری جنرل دمتری کرکنٹزیزنے کہا ہے کہ سعودی عرب نے عالمی نمائش 2030 کی میزبانی کے لیے ایک مضبوط کیس پیش کیا ہے۔ سعودیہ کے پاس ایکسپو کی میزبانی کے لیے ہر ضروری چیز موجودہے۔میڈیارپورٹس کے مطابق بی آئی ای کا جائزہ مشن گذشتہ ہفتے الریاض کے دورے پر پہنچا تھا۔

اس کا مقصد ایکسپو کی میزبانی کی ملک کی تجویز کا جائزہ لینا تھا۔الریاض میں قیام کے دوران میں وفد نے ولی عہد شہزادہ محمد بن سلمان کے علاوہ متعدد وزرا اور عہدے داروں سے ملاقاتیں کی ہیں۔انھوں نے مملکت کی امیدواری کے بارے میں مزید وضاحت کی۔وفد نے الریاض ایکسپو 2030 کی مجوزہ جگہ کا بھی دورہ کیا اور اسے ہائی ٹیک پبلک ٹرانسپورٹ سسٹم سے متعارف کرایا گیا جو شہر کے بنیادی ڈھانچے کے منصوبے کا محور ہے۔

سیکریٹری جنرل نے دورے کے اختتام پر ایک نیوزکانفرنس میں کہا کہ ہم نے سعودی عرب کے جن احباب اور عہدے داروں سے بھی بات چیت کی ہے، ہم نے ان سب کو اس منصوبے کے لیے ناقابل یقین حدتک پرعزم پایا ہے۔اس میں کوئی شک نہیں کہ سعودی عرب اور الریاض کے پاس ایکسپو کی میزبانی کے لیے ہر ضروری چیز موجود ہے۔دمتری کرکنٹزیزنے کہا کہالریاض میں جو پیش رفت دیکھنے کو مل رہی ہے،وہ سعودی عرب کو ایکسپو کے لیے مسابقتی امیدوار بنانے میں اہم کردارادا کرتی ہے۔

اس ضمن میں شہر کے بنیادی ڈھانچے کی توسیع ایک لازمی عنصر ہےجواس طرح کی ایکسپو کی ضروریات کو مکمل طور پر پورا کرتا ہے۔سعودی عرب نے ستمبر 2022 میں الریاض میں ورلڈ ایکسپو 2030 کی میزبانی کے لیے باضابطہ طور پر اپنی جامع درخواست جمع کرائی تھی۔ وہ یکم اکتوبر 2030 سے 31 مارچ 2031 تک الریاض میں عالمی نمائش کی میزبانی کرنے کا ارادہ رکھتا ہے جس کا موضوع تبدیلی کا دورایک دوراندیش کل کے لیے ایک ساتھ ہے۔