سپریم کورٹ حکم کی خلاف ورزی کر نیوالا گھر جا ئیگا :پرویز الٰہی

لاہو ر: تحریک انصاف کے مرکزی صدر چودھری پرویز الٰہی نے کہا ہے کہ پرانے اتحادیوں کے ساتھ بات چیت آگے بڑھ رہی ہے، جلد خوشخبری دینگے ،اب جو آئین اور سپریم کورٹ کے حکم کی خلاف ورزی کرے گا وہ گھر جائے گا ۔

پرویز الٰہی سے سپیکر پنجاب اسمبلی سبطین خان اور سابق صوبائی وزرا سردار آصف نکئی، محمد ہاشم ڈوگر اور فیاض چوہان نے ملاقات کی جس میں سپریم کورٹ کے فیصلے کے بعد کی سیاسی صورتحال پر تبادلہ خیال کیا گیا۔اس موقع پر پرویز الٰہی نے کہا کہ سپریم کورٹ کے واضح فیصلے نے الیکشن کی راہ میں حائل تمام رکاوٹیں دور کر دی ہیں۔

کابینہ کی مجال نہیں کہ سپریم کورٹ کے حکم پر عملدرآمد کی راہ میں رکاوٹ بن سکے ، پارلیمنٹ میں ججوں کی ذاتیات پر حملے آئین کی کھلی خلاف ورزی ہیں، عدلیہ کے پر کاٹنے کی کوشش کرنے والوں کے اپنے پر کٹ چکے ہیں۔

نواز شریف اب لندن میں بیٹھ کے اپنے زخم ہی چاٹتے رہیں گے ، شہباز شریف کو صدرعلوی سے تکلیف یہ ہے کہ ان کو غیر آئینی کاموں پر ٹوکتے اور روکتے کیوں ہیں ، ایم کیو ایم اور جی ڈی اے عدلیہ کے خلاف پی ڈی ایم کی سازشوں کا حصہ نہیں بنیں گی۔