عمران خان زرداری پر قتل کے الزامات کا ثبوت دیں، قمرزمان کائرہ

جھوٹا الزام لگانے پر عمران خان کیخلاف مقدمہ دائر کریں گے،رہنما پی پی کا ردعمل

اسلام آباد: پیپلز پارٹی کے رہنما قمرزمان کائرہ نے کہا ہے کہ عمران خان زرداری پر قتل کے الزامات کا ثبوت دیں، عمران خان اپنے مخالفین کیخلاف الزامات لگا رہے ہیں،عمران خان کو بتانا ہوگا کہ کیا ثبوت ہیں جس کی بنیاد پر ہماری قیادت پر الزام لگایا۔ایک انٹرویو
میں ان کا کہنا تھا کہ اگر ثبوت درست ہیں تو جو بھی ملوث ہوگا اسے سزا ملنی چاہئے، الزام غلط ثابت ہوا تو عمران خان کو سزا سے بچنا نہیں چاہئے۔انہوں نے کہا کہ عمران خان کیخلاف جھوٹا الزام کا مقدمہ دائر کریں گے، ہماری پارٹی کے کسی کارکن یا قیادت پر حملہ ہوا تو اس کاذمہ دارکون ہوسکتا ہے؟قمرزمان کائرہ نے کہا کہ اگر عمران خان کے پاس مصدقہ اطلاعات ہیں تو اداروں کو دیں،اگر مصدقہ اطلاعات یا ثبوت نہیں ہیں تو عمران خان کو قانونی کارروائی کا سامنا کرنا پڑے گا۔