عمران قانون شکن، خانہ جنگی کی اجازت نہیں د ینگے: مریم اورنگزیب

اسلام آباد: وفاقی وزیر اطلاعات و نشریات مریم اورنگزیب نے کہا ہے کہ زمان پارک میں ریاستی اداروں کو چیلنج کیا جا رہا ہے، عمران خان کو ملک میں خانہ جنگی، تشدد، انارکی کو ہوا دینے کی اجازت ہر گز نہیں دی جا سکتی۔

برطانوی نشریاتی ادارے کو انٹرویو دیتے ہوئے مریم اورنگزیب کا کہنا تھا کہ پولیس صرف کرپشن کیسز میں عمران خان کو گرفتار کرنے کے لئے عدالتی احکامات کی تعمیل کر رہی ہے، پولیس کے پاس کوئی ہتھیار نہیں تھے، پولیس اہلکاروں کو پٹرول بموں، ڈنڈوں اور پتھروں سے مارا گیا۔

عمران خان نے کارکنوں، خواتین اور بچوں کو انسانی ڈھال کے طور پر استعمال کیا، حالیہ آڈیو لیک ثبوت ہے کہ عمران خان نے پٹرول منگوا کر پٹرول بموں میں استعمال کرایا، وہ غیر قانونی عمل سے عدالت پر اثر انداز ہونے کی کوشش کر رہے ہیں۔

مریم اورنگزیب کا مزید کہنا تھا کہ عمران خان قانون نافذ کرنے والے اداروں سے تعاون کے بجائے قانون شکنی کر رہا ہے، عمران خان کو ملک میں خانہ جنگی، تشدد، انارکی کو ہوا دینے کی اجازت ہر گز نہیں دی جا سکتی۔