فضائی سرحدوں کے تحفظ کیلئے پاک فضائیہ کا کردار لائق تحسین:اسحاق ڈار

اسلام آباد: وفاقی وزیرخزانہ ومحصولات سینیٹرمحمداسحاق ڈارنے ملک کی فضائی سرحدوں اورفضائی مفادات کے تحفظ کیلئے پاک فضائیہ کے کردارکو سراہاہے۔انہوں نے یہ بات بدھ کویہاں پاک فضائیہ کے ائیرمارشل غلام عباس گھمن (ستارہ امتیازملٹری) سے ملاقات میں گفتگوکے دوران کہی۔

ملاقات میں ملک کی موجودہ اقتصادی اورسلامتی کی صورتحال پرگفتگو ہوئی۔وزیرخزانہ نے ملک کے فضائی سرحدوں اورفضائی مفادات کے تحفظ کیلئے پاک فضائیہ کے کردارکی تعریف کی۔وزیرخزانہ نے ملک کے فضائی سرحدوں کے نگرانی کیلئے پی اے ایف کے کردار پراطمینان کااظہارکیا اورپاک فضائیہ کیلئے موجودہ حکومت کی جانب سے ہرممکن تعاون کایقین دلایا۔

ائیرمارشل غلام عباس گھمن نے معاونت اورتعریف پروزیرخزانہ کاشکریہ اداکیا۔دریں اثنا وفاقی وزیر خزانہ و محصولات سینیٹر محمد اسحاق ڈار سے بدھ کو یہاں سکوا ش کے شہرہ آفاق کھلاڑی جان شیر خان نے ملاقات کی۔ وزارت خزانہ کے ترجمان کے مطابق جان شیر خان نے علاج کیلئے بروقت مالی معاونت فراہم کرنے پر وزیر خزانہ کا شکریہ ادا کیا۔ وزیر خزانہ نے جان شیر خان کی قومی خدمات کو سراہا اور کہا کہ وہ پاکستان کا فخر ہیں۔