فوج ، اسٹیبلشمنٹ سے لڑائی نہیں، الیکشن تاریخ دی جائے: شیخ رشید
Share
اسلام آباد: سابق وزیر داخلہ شیخ رشید نے کہا ہے کہ فوج یا اسٹیبلشمنٹ سے کوئی لڑائی نہیں، ہم اداروں کے ساتھ الیکشن کی تاریخ پر صلح رکھنا چاہتے ہیں، لڑائی ان سے ہے جو ملک کی دولت لوٹ کر باہر لے گئے۔
لڑائی اس حد تک ہے کہ چاہتے ہیں الیکشن کی تاریخ دیدی جائے ۔گزشتہ روزاسلام آباد ہائیکورٹ کے باہر میڈیا سے گفتگو کرتے ہوئے شیخ رشید نے مزید کہا کہ جنرل(ر)باجوہ کہتے ہیں انہوں نے انٹرویو نہیں دیا۔
جب سے میری والدہ کی وفات ہوئی میں نے جھوٹ بولنا چھوڑدیا، میری سابق آرمی چیف سے کوئی ملاقات نہیں ہوئی، میں کالج میں تھا تو جنرل(ر)باجوہ میرے جونیئر تھے۔
صحافی نے سوال کیا کہ جنرل(ر)باجوہ کیسے آدمی ہیں؟ جس پرشیخ رشید نے کہا کہ یہ جنرل(ر)باجوہ سے ہی پوچھ لیں۔ رانا ثناء اﷲ کا دماغ خراب ہو گیا ہے، اسکا انجام برا ہو گا۔رانا ثناء اﷲ جو خانہ جنگی کررہے ہیں اسی کی بھینٹ وہ خود چڑھیں گے، یہ کہنا کہ ہم رہیں گے یا وہ، پارٹیاں کبھی ختم نہیں ہوتیں،گندے لوگ کئی ختم ہوگئے۔
جو رانا ثناء اﷲ نے ماڈل ٹاؤن میں کیا ، اس پر وہ اپنے انجام کو پہنچے گا۔عمران خان کے سینکڑوں کیسز ہیں، میرے خلاف الگ کیسز ہیں۔ ہم الیکشن چاہتے ہیں بے شک اکٹھے ہو جائیں یا الگ الگ ۔ عمران خان کی قتل کی سازش کے بیان پر آج بھی قائم ہوں۔