مرکز سے تعلقات مزید مستحکم کرنے کیلئےشعوری کاوشیں کی جارہیں، گورنر بلوچستان

کوئٹہ: گورنر بلوچستان ملک عبدالولی خان کاکڑ نےوفاقی دارالحکومت اسلام آباد میں بلوچستان نیشنل پارٹی کے قائد سردار اختر جان مینگل کی رہائش گاہ پر ان سے ملاقات کی۔ ملاقات کے دوران ملک کی تازہ ترین صورتحال، بلوچستان میں امن وامان کے حالات اور سیاسی و معاشی استحکام سمیت باہمی دلچسپی کے امور پر تبادلہ خیال کیا گیا۔

بی این پی کے قائد سردار اختر جان مینگل نے گورنر بلوچستان کو گورنر کا منصب سنبھالنے پر مبارکباد دیتے ہوئے کہا کہ گورنر کا منصب ایک اعزاز ہونے کے ساتھ ساتھ ایک بڑی ذمے داری کا نام بھی ہے۔ اس موقع پر گورنر بلوچستان ملک عبدالولی خان کاکڑ نے اپنے سیاسی قائد کا خصوصی شکریہ ادا کیا۔

گورنر بلوچستان نے اپنی کارکردگی سے سردار اختر جان مینگل کو آگاہ کرتے ہوئے کہا کہ یہ ہمارے خوش قسمتی ہے کہ گورنر ہائوس اینڈ سیکریٹریٹ میں ہمیں بہت تجربہ کار، ملنسار اور خدمت خلق کے جذبے سے سرشار ٹیم ملی ہے جو روز اول سے تمام سرگرمیوں اور دفتری امور میں بھرپور تعاون اور مدد فراہم کرتی آرہی ہے۔

صوبے کے ایک آئینی سربراہ کی حیثیت سے ہم نے اپنی تجربہ کار ٹیم کے ساتھ صوبے بھر کے حالات و واقعات پر کڑی نظر رکھی ہیں، انہوں نے کہا کہ بارڈر ٹریڈز کو فعال بنانے، ہائیر ایجوکیشن کے ثمرات سے نوجوانوں کو مستفید کرانے، ہائیر ایجوکیشن کمیشن کے توسط سے ساحلی علاقوں کے اسٹوڈنٹس کو 200اسکالرشپ فراہم کرنے، پہلی بار آل بلوچستان پبلک سیکٹر یونیورسٹیوں کے وائس چانسلرز کانفرنس کو منعقد کرنے اور مرکز و صوبوں کے تعلقات کو مزید مستحکم کرنے کے حوالے سے شعوری کاوشیں کی جارہی ہیں۔

علاوہ ازیں صوبے کے تمام اضلاع بالخصوص پسماندہ اور دورافتادہ علاقے کے دورے بھی جاری ہیں تاکہ فوری نوعیت کے عوامی مسئلے بروقت حل ہو جائیں، اس کے علاوہ میرٹ کی پاسداری اور شفافیت کو اپنا شعار بنا رکھا ہے، منصب سنبھالتے ہی گورنر ہائوس کے دروازے عام لوگوں کیلئے کھلے رکھے ہیں جن میں گورنر ہائوس اینڈ سیکریٹریٹ کے آفیسرز اور ملازمین صبح سے شام تک عوام کی خدمت میں پیش پیش ہیں۔

گورنر بلوچستان ملک عبدالولی خان کاکڑ نے مزید کہا کہ صوبے میں کام کرنے والے وفاقی اداروں کی کارکردگی کو بہتر بنانے اور عوامی شکایات کے ازالے کے حوالے سے باقاعدگی سے جائزہ اجلاس ہو رہے ہیں۔

جن کے معنی خیز نتائج برآمد ہو رہے ہیں۔ ہمارا اصل مقصد یہ ہے کہ عوام کے مسائل فوری طور پر حل ہو جائیں اور عوامی شکایات کا ازالہ جلد سے جلد ممکن ہو جائے۔ گورنر بلوچستان نے کہا کہ اپنے قائد کے ویژن پر عمل پیرا ہوکر ہی یہ میری اور میری ٹیم کی اصل کامیابی ہوگی۔