معاشرہ خصوصی افرادکی مددکرے،نظراندازنہیں :صدر عارف علوی

اسلام آباد: صدر مملکت ڈاکٹر عارف علوی نے خصوصی افراد کی مالی خودمختاری کیلئے مخصوص ملازمتیں پیدا کرنے کی ضرورت پر زور دیتے ہوئے کہا ہے کہ خصوصی افراد کی حوصلہ افزائی اور مدد سرکاری اور نجی شعبوں کی اجتماعی ذمہ داری ہے۔گزشتہ روزایوان صدر کے پریس ونگ سے جاری بیان کے مطابق صدر مملکت نے پاکستان فائونڈیشن فائٹنگ بلائنڈنس کے وائس چیئرمین ڈاکٹر انیس الرحمن سے گفتگو میں کہا کہ خصوصی افراد کو کارآمد شہری بنانے کیلئے تربیت اور مخصوص مہارتوں سے لیس کرنے کی ضرورت ہے۔

معاشرے کو خصوصی افراد کو نظر انداز نہیں کرنا چاہئے۔صدر نے حکومتی اور نجی شعبوں پر بینائی سے محروم افراد کو درپیش مسائل حل کرنے میں مدد کرنے پر زوردیتے ہوئے کہا کہ رویوں میں مثبت تبدیلی لانے کیلئے خصوصی افراد کے حقوق اور مسائل کے بارے میں شعور اجاگر کرنے کی ضرورت ہے۔

ڈاکٹر انیس الرحمن نے صدر کو نابینا افراد کی فلاح و بہبود کیلئے کئے گئے اقدامات سے آگاہ کیا۔ اس موقع پر صدر مملکت کو بریفنگ میں بتایا گیا کہ فائٹنگ بلائنڈ نس فائونڈیشن نے گزشتہ دس سالوں کے دوران 50 ہزار سے زائد بصارت سے محروم افراد کی زندگیوں کو بدلا۔ صدر مملکت کو آگاہ کیا گیا کہ بصارت سے محروم طلبہ کو درپیش ایک بڑا مسئلہ امتحانات کے دوران لکھنے کیلئے معاونین کی عدم دستیابی ہے۔