’’نور جہاں ‘‘ کا علاج جاری،ٹیسٹ اور الٹرا سائونڈ بھی کیے گئے

کراچی: کراچی کے چڑیا گھر میں ہتھنی نورجہاں کا علاج جاری ہے ۔ذرائع کے مطابق کراچی کے چڑیا گھر کی بیمار ہتھنی نورجہاں کا علاج جاری ہے اور ڈائریکٹرچڑیاگھرکنورایوب نے بتایاکہ گزشتہ روز اس کے ٹیسٹ اور الٹرا سائونڈ بھی کیے گئے ہیں۔

جس کی رپورٹ آنے کے بعد اسے فور پاز ٹیم کو ارسال کیا جائے گا۔ڈائریکٹر چڑیا گھر کے مطابق ہتھنی کا ہر 3 سے 4 گھنٹے میں پہلو تبدیل کرایا جا رہا ہے اور منگل کی صبح بھی اس کی پوزیشن تبدیل کرائی گئی۔

جب کہ ملٹی وٹامنز ڈرپس اور ادویہ بھی دی جا رہی ہیں جس سے نورجہاں کا انرجی لیول بڑھا ہے۔انہوں نے بتایا کہ ایڈمنسٹریٹر کراچی نے ہتھنی کی صحت کے لیے ماہرین پر مشتمل کمیٹی بھی تشکیل دے دی ہے۔ ڈاکٹرز ہتھنی کی صحت سے متعلق فور پاز ٹیم سے مسلسل رابطہ میں ہیں اور اس کی جانب سے دی گئی ہدایات پر مکمل عمل کیا جا رہا ہے۔

ڈائریکٹر نے مزید کہا کہ ہتھنی کیلیے پی پی رہنما آصفہ بھٹو کی جانب سے پانی کا چھڑکا کرنے والے 6 پنکھے بھیجے گئے تھے جو لگا دیے گئے ہیں۔انہوں نے کہاکہ نورجہاں کے کمپاﺅنڈ کو جراثیم اور کیڑے مکوڑوں سے محفوظ رکھنے کیلیے چونے کا چھڑکائوبھی کیا جا رہا ہے۔