ٹیکنالوجی : چینی کمپنی نے سپر پاکستانی’’ نیلی راوی ‘‘ بھینس کی نسل محفوظ کرلی

اسلام آباد (این این آئی) چینی کمپنی نے ET.IVF.OPUٹیکنالوجی کی مدد سے ایک اعلیٰ لیکن بوڑھی پاکستانی بھینس کی نسل کو کامیابی سے محفوظ کر کے اس کے جنین سے حمل حاصل کرلیا۔

رائل سیل بائیو ٹیکنالوجی (پاکستان) میں بفیلو ایمبریو کے ٹیکنیکل مینیجر ڈاکٹر قیصر شہزاد نے بتایا کہ ہم نے نیلی راوی بھینس سے بیضہ حاصل کیا جوکہ ایک نوجوان بھینس کی دادی تھی جس نے یونیورسٹی آف ایگریکلچر، فیصل آباد میں منعقدہ مقابلے کے دوران 28.3 کلو گرام دودھ دینے کا عالمی ریکارڈ بنایا تھا ۔

ان کا کہنا تھا کہ بھینس نے گزشتہ 4 برس میں بڑھاپے (20 سال) کی وجہ سے اولاد کو جنم نہیں دیا۔

الٹراساؤنڈ گائیڈڈ او پی یو کا استعمال کرتے ہوئے اس بھینس سے 4 بیضے حاصل کئے گئے اور اس کے نتیجے میں 2 ایمبریو پیدا ہوئے۔

ابراہیم ڈیری فارم، فیصل آباد میں ایک جنین کو ایک چھوٹی بھینس میں منتقل کیا گیا اور حمل حاصل کیا گیا۔

اس فارم میں 8 بھینسوں میں ایمبریو منتقل کرنے کے بعد کل 6 حمل ہوئے جبکہ دیگر فارموں کے نتائج کا انتظار ہے۔

ڈاکٹر قیصر نے کہا کہ انہوں نے’’سپر‘‘بھینس کی نسل کو محفوظ کرلیا ہے۔

یہ ہمیں عطیہ دہندگان جیسی اعلیٰ خصوصیات کے ساتھ بہت سی بھینسیں پیدا کرنے کے قابل بنائے گا۔