پاکستان میں کاروبارپر10سال ٹیکس چھوٹ،چینی کمپنیاں سرمایہ کاری کریں، صدرمملکت
Share
اسلام آباد: صدر مملکت عارف علوی نے پاکستان میں دستیاب سرمایہ کاری کے مواقع اور سرمایہ کاری دوست پالیسیوں کو اجاگر کرتے ہوئے کہا ہے کہ آئی ٹی سیکٹر کی ترقی ملک کی اہم ترجیحات میں شامل ہے۔
غیر ملکی تاجروں اور سرمایہ کاروں کو اس اہم شعبے میں سرمایہ کاری سمیت ترقی کے بے پناہ امکانات سے استفادہ کرنا چاہئے ۔گزشتہ روزیہاں ایوان صدرمیں صدرمملکت نے چینی کمپنی ایزی وے انوویشن ٹیکنالوجی کمپنی لمیٹڈ کےوفد سے گفتگو میں کہا کہ سپیشل ٹیکنالوجی زونز اتھارٹی کاروباری اداروں کے لئے 10 سال کی ٹیکس چھوٹ سمیت مختلف مراعات کی پیشکش کرتی ہے اور چینی آئی ٹی کمپنیوں کو ان مواقع سے فائدہ اٹھانا چاہئے۔
چینی وفد کے سربراہ نے صدر مملکت کو مختلف آئی ٹی خدمات اور صنعتی حل فراہم کرنے میں اپنی کمپنی کے کردار کے بارے میں آگاہ کیا۔انہوں نے بتایا کہ ایزی وے سمارٹ ٹرانسپورٹیشن، سمارٹ لاجسٹکس اور دیگر شعبوں کے لئے مربوط حل اور پیشہ ورانہ سافٹ ویئر ڈیویلپمنٹ فراہم کرتی ہے۔
انہوں نے بتایا کہ ان کی کمپنی نے پاکستان ریلوے کیلئے ای۔ٹکٹنگ سسٹم تیار کیا ہے جس سے ادارے کی کارکردگی کو بڑھانے میں مدد ملے گی۔وفد کی قیادت کمپنی کے چیف ایگزیکٹو آفیسر جو ہانیو کر رہے تھے ۔