پاکستان نازک دور سے گزر رہا، چیلنجز کا سامنا: بلاول

اسلام آباد: وزیرخارجہ بلاول بھٹو زرداری نے کہاہے کہ پاکستان نازک دورسے گزررہاہے،معاشی مشکلات اورسیلاب زدگان کی مکمل بحالی بڑے چیلنجز ہیں۔ ان خیالات کا اظہار انہوں نے جمعرات کو یہاں وزارت خارجہ میں سفارتی کور کے اعزاز میں دیئے گئے بین المذاہب افطار ڈنر سے خطاب کرتے ہوئے کیا۔

افطار ڈنر میں اسلام آباد میں مقیم سفیروں، ہائی کمشنرز، مختلف ممالک کے مشنز کے سربراہان ، سابق وزیر اعظم سینیٹر سید یوسف رضا گیلانی، وزیر مملکت برائے خارجہ امور حنا ربانی کھر، قومی اسمبلی کے سپیکر راجہ پرویز اشرف، سیکرٹری خارجہ ڈاکٹر اسد مجید خان، وفاقی وزراءاور ارکان پارلیمنٹ نے شرکت کی۔

بلاول بھٹونے کہاکہ رمضان المبارک ہمیں مالی مشکلات کاشکارلوگوں کی مددکی یاددلاتاہے،دیگرممالک کی طرح پاکستان کوبھی مختلف چیلنجز کاسامناہے،چیلنجز سے نمٹنے کیلئے دوست ممالک نے ہماری مددکی،کوروناکے باعث پاکستان کومعاشی مشکلات درپیش رہیں،بی آئی ایس پی کے تحت مستحقین کوریلیف فراہم کررہے ہیں۔

وزیرخارجہ نے کہا پاکستان کو موسمیاتی تبدیلیوں کی تباہ کاریوں کے سنگین نتائج اور کورونا وباءکے تناظر میں معاشی چیلنجز کا سامنا ہے، حکومت کی اولین ترجیح غریبوں اور معاشی طور پر کمزور طبقوں کی حالت کو بہتر بنانا ہے، ملک اس وقت مشکل معاشی حالات سے گزر رہا ہے۔

وزیر خارجہ نے حالیہ سیلاب کے دوران پاکستان کی مدد کرنے پر عالمی برادری کا شکریہ ادا کیا۔ اس موقع پر پاکستان میں ڈپلومیٹک کور کے ڈین عطاجان مولاموف نے خطاب میں عالمی امن اور ہم آہنگی کیلئے بین المذاہب رابطے کی اہمیت پر زور دیا۔ انہوں نے کہا یورپی یونین نے پاکستان کو ہائی رسک ممالک کی فہرست سے نکالا ہے جو قابل تحسین اقدام ہے۔