پاک فوج ابھرتی ہوئی عالمی فوجی طاقت قرار، نئی درجہ بندی میں ساتواں نمبر

اسلام آباد: فوجی طاقت کی نئی درجہ بندی میں پاکستانی افواج کو ابھرتی ہوئی عالمی فوجی طاقت قرار دیا گیا ہے، پاک فوج اب دنیا کی ساتویں طاقتور ترین فوج بن چکی ہے۔  پاکستان نے تین سالوں میں آٹھ درجے چھلانگ لگائی ہے، پاکستان آرمی کو ملٹری سٹرینتھ رینکنگ 2020، 2021 اور 2022 میں بالترتیب 15ویں، 10ویں اور دنیا کی 9ویں طاقتور ترین فوج کے طور پر درج کیا گیا تھا۔میڈیا رپورٹ کے مطابق گلوبل فائر پاور 2006 سے فوجی طاقت کی درجہ بندی شائع کر رہا ہے۔

ہر سال یہ ممکنہ جنگی صلاحیتوں کی بنیاد پر تمام ممالک کی افواج کی درجہ بندی کرتاہے۔یہ ادارہ 60 سے زیادہ عوامل کو مدنظر رکھتے ہوئے ہر ملک کو ایک Power Index سکور تفویض کرتا ہے۔

پاور انڈیکس کی قدر جتنی چھوٹی ہوگی، ملک کی لڑنے کی صلاحیت اتنی ہی زیادہ ہوگی۔پاکستان کا پاور انڈیکس 0.1694 سکور ہے جو جاپان، فرانس، اٹلی، ترکی، برازیل، ایران، اسرائیل، سعودی عرب، جرمنی اور کینیڈا سے بہتر ہے۔

اس سال بھی امریکہ، روس اور چین نے ٹاپ تھری میں جگہ بنائی ہے۔ہیومن ڈویلپمنٹ انڈیکس کے مطابق پاکستان کو 161 ویں نمبر پر رکھا گیا ہے، جو اس بات کی نشاندہی کرتا ہے کہ پاکستان کو تعلیم، صحت کی دیکھ بھال اور معیار زندگی بہتر بنانے جیسے معاملات میں ابھی بہت طویل سفر طے کرنا ہے۔

پریس فریڈم انڈیکس میں پاکستان کو 157 ویں نمبر پر رکھا گیا جو میڈیا کی آزادی اور صحافیوں کے تحفظ کی کمی کو ظاہر کرتا ہے، جس کی وجہ سے آزادی اظہار اور معلومات کے پھیلا ئوپر پابندیاں عائد ہوتی ہیں۔گلوبل جینڈر گیپ رپورٹ میں پاکستان کو 145 ویں نمبر پر رکھا گیاجو معاشی شراکت، تعلیم، صحت اور سیاسی نمائندگی جیسے شعبوں میں نمایاں صنفی تفاوت کی موجودگی کی نشاندہی کرتا ہے۔

پاسپورٹ انڈیکس، جو ممالک کی ان کے شہریوں کی سفری آزادی کی بنیاد پر درجہ بند کرتا ہے، میں پاکستان کو 106ویں نمبر پر رکھا گیا ہے۔اس کا مطلب یہ ہے پاکستانی شہریوں کودوسرے ممالک میں ویزا فری سفر تک محدود رسائی ہے، جو بین الاقوامی تجارت، سیاحت اور ثقافتی تبادلے کے مواقع میں رکاوٹ بن سکتی ہے ۔