پرویز الٰہی ٹیپ کی تحقیقات، کارروائی کی جائے: احسن اقبال
Share
شکرگڑھ : وفاقی وزیر منصوبہ بندی احسن اقبال نےکہا ہے کہ میچ فکسنگ کے بعد اب پرویز الٰہی ٹیپ سے تو عدالتی کیس فکسنگ کا بھی تاثر مل رہا ہے، جس کی تحقیقات ہونی چاہئے۔
نورکوٹ میں میڈیا سے گفتگو کرتے ہوئے انہوں نے کہا پی ٹی آئی حکومت،دہشت گردوں کو دوبارہ سر اٹھانے کا موقع دے کر گئی۔
اسٹیبلشمنٹ کا سیاست سے باہر نکلنا ’’ووٹ کو عزت دو ‘‘ کے بیانیے کی جیت ہے،اسٹیبلشمنٹ ،عدلیہ،بیوروکریسی اور سیاست دانوں کو ماضی سے سبق سیکھنا چاہیے، ووٹ کو عزت دو بیانیہ زندہ ہے اور زندہ رہےگا۔ آئین پاکستانی عوام کے حق حکمرانی کی نگہبانی کرتا ہے۔انہوں نے کہا پرویز الٰہی ٹیپ کی تحقیقات کرکے ذمہ داروں کے خلاف کارروائی ہونی چاہئیے،یوں لگتا ہے عمران خان ملک دشمن قوتوں کا آلہ کار بن چکا ہے۔
بھارت اور پی ٹی آئی میڈیا سیل ایٹمی پروگرام کے خلاف بے بنیاد مہم چلا رہا ہے ، عمران خان اپنی سیاست کو ختم ہوتا دیکھ کر حواسِ باختہ ہوچکا ہے،عمران خان کی جیل بھرو تحریک اپنے کارکنان کو جیلوں میں ڈالنے کی کوشش ہے۔
عمران خان کے مشکور ہیں کہ وہ اپنے کارکنان کو جیل ڈالنا چاہتے ہیں، دو صوبائی حکومتیں ختم کرنے پر عمران خان کے شکرگزار ہیں اور سیاسی نالائقی پر عمران خان نوبل انعام کے حقدار ہیں۔ ایم این اے علی وزیر کی رہائی میں تاخیر کے سوال پر احسن اقبال نے کہا کہ خوشی ہے کہ علی وزیر کو رہائی ملی، یہ قانون کی جیت ہے۔