کمیونٹی شراکت کے بغیر حقیقی ترقی ممکن نہیں، صدر

اسلام آباد: صدر مملکت ڈاکٹر عارف علوی نے کہا ہے کہ ملک کو سماجی و اقتصادی طور پر خوشحال بنانے کیلئےصرف قدرتی و انسانی وسائل کافی نہیں، دانشمندی، پالیسیوں میں مستقل مزاجی، الجھنوں سے گریز اور ایک دوسرے کے ساتھ فعال تعاون ملک کو ترقی کی راہ پر گامزن کرنے کے لئے ضروری ہے۔ صدر مملکت نے ان خیالات کا اظہار پیر کو اسلام آباد میں گلگت بلتستان حکومت کے زیر اہتمام ’’جی بی ڈریم روڈ شو‘‘ کے عنوان سے منعقدہ تقریب سے خطاب کرتے ہوئے کیا۔

تقریب میں گورنر گلگت بلتستان سید مہدی شاہ، وزیر اعلیٰ گلگت بلتستان خالد خورشید خان، جی بی حکومت کے وزراءچیف سیکرٹری محی الدین وانی اور دیگر شخصیات نے شرکت کی۔

تقریب سے خطاب کرتے ہوئے صدر مملکت نے کہا کہ گلگت بلتستان انہیں بہت عزیز ہے، گلگت بلتستان قدرتی وسائل جیسے معدنیات، قیمتی جواہرات اور پھلوں سے مالا مال ہے، ہمیں جواہرات کی کٹائی اور فنشنگ کے لیے سائنسی طریقے استعمال کرنے کی ضرورت ہے ۔

صدر مملکت نے کہا زراعت کے میدان میں جی بی نہ صرف اپنی خوراک کی ضروریات پوری کر سکتا ہے بلکہ اس میں ہالینڈ کی طرح دنیا کو برآمد کرنے کی صلاحیت ہے۔انہوں نے کہا کہ آئیڈیاز کی بہتات ہے لیکن اب وقت آگیا ہے کہ ان پر عملدرآمد کیا جائے۔

انہوں نے کہا کہ حقیقی ترقی کمیونٹی کی شراکت کے بغیر ممکن نہیں ہے اور جی بی کے لوگوں کو علاقے میں ترقی کے فروغ کے لیے پوری طرح اور فعال طور پر مصروف عمل ہونا چاہیے۔ اس موقع پر وزیر اعلیٰ گلگت بلتستان خالد خورشید خان نے کہا کہ ماضی میں جی بی کو وسائل کی تقسیم کے حوالے سے نظر انداز کیا گیا ۔

انہوں نے کہا کہ ان کی حکومت گزشتہ دو سالوں سے ترقی کے لیے زیادہ فنڈز مختص کر رہی ہے اور اس کی توجہ ترقی کی طرف ہے۔تقریب میں شعیب سلطان نے آغا خان رورل سپورٹ پروگرام برائے جی بی کے ساتھ اپنے طویل سفر کا احوال بیان کیا ۔

قبل ازیں صدر مملکت نے شو کے مختلف سٹالز کا بھی دورہ کیا۔