کورونا :51نئے مریض،10 موت وحیات کی کشمکش میں مبتلا

اسلا م آباد ،لاہور: کورونا کی مہلک وباسے پاکستان میں مزید کوئی فردجاں بحق نہیں ہوا اور اموات کی تعداد30652ہی رہی۔نیشنل کمانڈ اینڈ آپریشن سنٹر ،وزارت قومی صحت اورنیشنل انسٹیٹیوٹ آف ہیلتھ کے مطابق گزشتہ 24گھنٹوں کے دوران ملک بھر میں 3283افراد کے کورونا وائرس ٹیسٹ کئے گئے۔

مثبت کیسز کی مجموعی شرح 1.55فیصد ہوگئی۔ کورونا کے51نئے مریض رپورٹ ہوئے اور فعال کیس 10863ہوگئے،10مریضوں کی حالت انتہائی تشویشناک ہے۔لاہور میں245 افراد میں سے 11 کے کورونا ٹیسٹ مثبت آئے اور مثبت کیسز کی شرح 4.49 فیصد رہی، کراچی میں 260 افراد میں سے 27 کے ٹیسٹ مثبت آئے اور مثبت کیسز کی شرح 10.38فیصد رہی جبکہ اسلام آباد میں125 میں سے ایک ٹیسٹ مثبت آیا اور شرح 0.80 فیصد رہی۔

عالمی وبا سےدنیا بھرمیں ہلاکتیں68لاکھ38ہزارڈیڑھ سوسےزائد ہو گئیں۔جاپان میں کورونا سے مزید22افراد چل بسےاور 9940نئے مریض سامنے آگئے۔روس میں مزید38افرادہلاک ہوگئے اور 5932نئے مریض سامنے آگئے۔ جنوبی کوریا میں مزید10مریض چل بسے اور 12444نئے رپورٹ ہوئے۔

بھارت میں کورونا کے مزید5676کیسز ریکارڈ کئے اور وبا سے ہلاکتوں کی تعداد بھی بڑھ کر 5لاکھ 31ہزار ہوگئی ۔ کورونا سے دہلی ، پنجاب اور راجستھان میں مزید تین تین جبکہ کرناٹک میں دواور گجرات ، ہریانہ ، مہاراشٹرا اور تمل ناڈو میں ایک ایک ہلاکت ہوئی ہے ۔