عمران کو سیاست کیلئے لاشیں چاہئیں:شاہد خاقان

کراچی : مسلم لیگ (ن) کے رہنما شاہد خاقان عباسی نے کہا ہےعمران خان کو سیاست کے لئے لاشیں چاہئیں لیکن حکومت ان کو ایسا موقع نہیں دینا چاہتی،بزدلوں کی طرح گھر بیٹھنے کے بجائے گرفتاری دیں، دو تین دنوں میں ضمانت مل جائے گی، عدالتوں کا کام انصاف کرنا ہے۔

جن کےوارنٹ جاری ہوئے انہیں پیش ہونا ہے، عدالتی احکامات ہیں یہ حکم حکومت کا نہیں، اگر سابق وزیر اعظم پیش نہیں ہوگا تو کوئی عدالتوں میں پیش نہیں ہوگا،عمران خان کو عدالتوں یا قانون کی نہیں صرف اپنی جان کی پرواہ ہے۔

احتساب عدالت کے باہر میڈیا سے بات کرتے ہوئے ان کا کہناتھا نظام اور عدالتوں کو دیکھ لیں، انصاف نہیں ملتا، لوگ سالہا سال سےجیلوں میں ہیں، ان کے کیسز کو ریویو کرلیں، اسی فیصد کیسز وہیں ختم ہوجائیں گے، ملک میں انصاف ہوتا ہوا نظر آئے، بدقسمتی یہ ہے اعلی عدلیہ کے پاس سوموٹو اختیار ہے مگر کبھی ان عدالتوں کا نوٹس نہیں لیا۔

ایٹمی اثاثے ہماری دفاع کا اہم جزو ہیں، ایک علاقے کی پولیس از خود دوسرے علاقے میں کارروائی نہیں کرسکتی، یہ نظام عمران خان ماضی میں چلاتے رہے،ہم اقتدار نہیں مسائل کا حل چاہتے ہیں،نوجوانوں کو اعتماد میں لیکر انکی مایوسی ختم کرنا چاہتے ہیں۔

آج پارلیمان مفلوج ہے ،پانچ برسوں سے ملکی مسائل پر پارلیمان پر بات ہوتی نہیں دیکھی،اثاثے بیچنا مسائل کا حل نہیں، جائزہ لینا ہوگا حالات یہاں تک کیسے پہنچے،ایٹمی اثاثوں سے متعلق بیان پر اسحاق ڈار کو پارلیمان کے اراکین کو ان کیمرہ اجلاس بلا کر اعتماد میں لینا چاہیئے۔

اگر کسی نے ملکی مفادات پر کمپرومائز کیا ہے تو پارلیمنٹ کی معلومات ہونی چاہیئے، پیٹرولیم مصنوعات کی قیمتوں کا تعلق حکومت سے نہیں، ڈی جی اوگرا کو خود قیمتوں کا اعلان کرنا چاہیئے، نواز شریف علاج کے لئے باہر گئے ہم نے انہیں سیاست سے الگ کردیا ،تحفہ ہمیں نہیں ریاست کو ملتا ہے،حکومت نے طریقہ کار طے کیا ہوا ہے، طے شدہ رقم کی ادائیگی کے بعد تحائف لئے جاتے ہیں۔