آئین کی گولڈن جوبلی شایان شان طریقےسےمنانےکااعلان
Share
اسلام آباد: سپیکر قومی اسمبلی راجہ پرویز اشرف نے آئین کی گولڈن جوبلی تقریبات شایان شان طریقے سے منانے کا اعلان کیا ہے۔
قومی اسمبلی سیکرٹریٹ کے مطابق سپیکر قومی اسمبلی نے آئین پاکستان کے 50 سال مکمل ہونے پر مہینہ بھر شاندار تقریبات کے انعقاد کا اعلان کیا ہے اور اس حوالے سے سینیٹر رضا میاں رضا ربانی کی سربراہی میں ایک 14 رکنی ایڈوائزری کمیٹی بھی تشکیل دی ہے جو ان تقریبات کے حوالے سے تمام انتظامات کی نگرانی کرے گی۔
سپیکر نے کہا ہے کہ ان تقریبات کے انعقاد کا مقصد ملک میں بسنے والے لوگوں کو آئین کی اہمیت سے روشناس کراناہے۔ ایڈوائزری کمیٹی میں وزیر خزانہ اسحاق ڈار، وزیرقانون اعظم نذیر تارڑ،سینیٹر کامران مرتضیٰ،وزیراطلاعات مریم اورنگزیب، ممبران قومی اسمبلی آغا حسن بلوچ، امیر حیدر اعظم خان، نفیسہ شاہ، محمد افضل خان ڈھانڈلہ، وجیہہ قمر، انجینئر صابر حسین قائم خانی، خالد حسین مگسی شامل ہوں گے ۔
سابق سینیٹرفرحت اللہ بابر اور پارلیمانی امور کے ماہر محمد ظفر اللہ خان بھی کمیٹی کا حصہ ہوں گے۔
ادھرچیئر مین سینٹ صادق سنجرانی کی زیر صدارت پارلیمانی رہنمائوں پرمشتمل کمیٹی کااجلاس ہوا۔ اجلاس میں سینٹ کے قیام کی گولڈن جوبلی منانے کے حوالے سے مشاورت کی گئی۔
چیئر مین سینٹ نے نے کہاکہ سینٹ کی گولڈن جوبلی تقریبات ملک بھر میں بھر پور جوش و جذبے سے منانے کا فیصلہ کیا تھا لیکن ملک کے معاشی حالات کو ملحوظ خاطر رکھتے ہوئے تقریبات کو محدود کیا جائے تاکہ اخراجات کو حتیٰ ا لامکان کم سے کم کیا جائے۔