نوجوان مستقبل ، تکنیکی تعلیم وقت کی اہم ضرورت ہے :گورنر پنجاب
Share
لاہور: گورنر پنجاب محمد بلیغ الرحمٰن سے مقامی ہوٹل لاہور میں کوتھم کے زیر اہتمام 23 ویں کانووکیشن کی تقریب میں بطور مہمان خصوصی شرکت کی۔
تقریب سے خطاب کرتے ہوئے گورنر پنجاب محمد بلیغ الرحمن نے کہا کہ نوجوان نسل پاکستان کا مستقبل ہیں اور تکنیکی علوم کی تعلیم وقت کی اہم ضرورت ہے۔
انہوں نے کہا کہ یہ خوش آئند بات ہے کہ نوجوان طلبہ کوتھم(COTHM) کے زیراہتمام ہاسپیٹیلٹی سے متعلق مختلف کورسز میں مہارت حاصل کررہے ہیں۔
انہوں نے طلبہ پر زور دیا کہ وہ ٹیکنالوجی کا استعمال سیکھیں کیونکہ تمام دنیا میں چوتھے صنعتی انقلاب میں اسے کلیدی حیثیت حاصل ہے۔انہوں نے کہا کہ بہترین مہارت سے آپ دنیا میں انقلاب برپا کرسکتے ہیں۔
مسلم لیگ(ن)نے اپنے سابقہ ادوار میں تکنیکی تعلیم کے فروغ کے لیے مثالی اقدامات اٹھائے۔ اس میں جنوبی پنجاب سرفہرست تھا۔ انہوں نے کہا کہ اب ووکیشنل پروگرام کم کردیئے گئے ہیں،ہمیں مستقبل کی طرف دیکھنا ہوگا۔
ﷲ نے ہمیں ایسے بہترین سیاحتی مقامات سے نوازا ہے جو دنیا کے کسی دوسرے حصے کے مقابلے میں نایاب ہیں۔
ہمارے ملک میں سیاحت کے شعبے میں لاکھوں نئی ملازمتیں پیدا کرنے کی صلاحیت موجود ہے۔تقریب سے خطاب کرتے ہوئے چیف ایگزیکٹو آفیسر کوتھم احمد شفیق نے ادارے کے اغراض و مقاصد پر تفصیلی روشنی ڈالی۔اس موقع پر گورنر پنجاب نے 500سے زائد طلباوطالبات میں میڈلز اور اسناد تقسیم کیں۔
تقریب میں مختلف شعبوں سے تعلق رکھنے والی اہم شخصیات سمیت طلبا وطالبات اور ان کے والدین کی کثیر تعداد موجود تھی۔ دریں اثنا گورنر پنجاب نے وزیراعظم کے معاون خصوصی احد چیمہ سے ملاقات کی اور ان کی والدہ کی وفات پر اظہارتعزیت اور فاتحہ خوانی کی۔