امیتابھ بچن دوران شوٹنگ زخمی، پسلی ٹوٹ گئی

ممبئی : بالی ووڈ شہنشاہ امیتابھ بچن فلم کی شوٹنگ کے دوران زخمی ہوگئے ، انکی پسلی ٹوٹ گئی۔

سوشل میڈیا پر جاری بلاگ پوسٹ کے ذریعے 80 سالہ بھارتی اداکار نے اپنے مداحوں کو بتایا کہ حیدرآباد میں فلم ’’پراجیکٹ کے‘‘ کے ایکشن سین کی شوٹنگ کے دوران وہ زخمی ہوگئے اور پسلی ٹوٹ گئی ۔

حادثہ کے بعد فلم کی شوٹنگ روک دی گئی اور انہیں فوری ہسپتال منتقل کیا گیا جہاں سی ٹی سکین اور ضروری طبی امداد کے بعد ڈسچارج کردیا گیا ۔

حادثہ میں شدید زخمی ہونے کے باعث حرکت کرنے اور سانس لینے میں دشواری کا سامنا ہے۔ پسلی میں شدید درد ہے ۔

تاہم ڈاکٹروں کا کہنا ہے کہ چند ہفتوں میں زخم ٹھیک ہو جائیگا۔ رپورٹس کے مطابق امیتابھ کو صحتیاب ہونے میں چند ہفتے لگیں گے اسلئے ڈاکٹرز نے مکمل آرام کا مشورہ دیا ہے۔

امیتابھ بچن کی اس آنیوالی فلم ’’پراجیکٹ کے‘‘ میں پربھاس اور دیپیکا پڈوکون بھی مرکزی کردار ادا کر رہے ہیں۔ فلم کی شوٹنگ عارضی طور پر منسوخ کر دی گئی ہے۔