پاکستان کیساتھ دوطرفہ تجارت اور سرمایہ کاری میں وسعت چاہتے:امریکی سفیر

اسلام آباد: امریکی سفیر ڈونلڈ بلوم نے کہا ہے کہ پاکستان سے تجارت بڑھانے کی گنجائش موجود ہے۔امریکی سفارتخانے اسلام آباد کی جانب سے پاکستان نیشنل کونسل آف دی آرٹس میں 2 روزہ یو ایس پاکستان انوویشن ایکسپو کا مقصد امریکی حکومت کی معاونت سے فعال ہونے والے نئے پاکستانی کاروباری سلسلوں (سٹارٹ اپس) کی کامیابیوں کی کہانیوں کو اجاگر اور ان کیلئے مزید سرمایہ کاری کی حوصلہ افزائی کرنا ہے۔

تقریب سے افتتاحی خطاب میں امریکی سفیر نے کہا کہ جامع اقتصادی ترقی کو فروغ دینا اور امریکہ اور پاکستان کے درمیان تجارت اور سرمایہ کاری میں اضافہ کرنا امریکی حکومت کی اولین ترجیحات میں سے ایک ہے۔

انہوں نے کہاکہ امریکہ پہلے ہی پاکستانی مصنوعات کیلئے سب سے بڑی برآمدی منڈی ہے جبکہ ہم سال بہ سال پاکستان میں امریکی سرمایہ کاری میں اضافہ دیکھ رہے ہیں تاہم اب بھی دوطرفہ تجارت کو وسعت دینے کی گنجائش موجود ہے۔

انہوں نے کہا کہ پاکستان بے پناہ صلاحیتوں سے مالامال ملک ہے تاہم کامیابی کی اگلی منزل تک رسائی کیلئے اختراع پسندی اور ٹیکنالوجی کو فروغ دینے کی اشد ضرورت ہے۔