چینی سائنسدانوں،صنعتکاروں کاوفدآئندہ ہفتے پاکستان آئیگا
Share
اسلام آباد: اسلامی تعاون تنظیم (او آئی سی)کے رکن ممالک میں روایتی ادویات اور اس سے منسلک بائیو میڈیکل سائنسز میں تعاون کو مضبوط بنانے کے لئے چینی سائنسدانوں اور صنعتکاروں کا ایک اعلیٰ سطح کا وفد پاکستان کا دورہ کرے گا۔
اسلامی تعاون تنظیم کے ذیلی ادارے کامسٹیک کی جانب سے جاری بیان کے مطابق چینی سائنسدانوں اور صنعت کاروں کا وفد ادارہ جاتی اور صنعتی روابط کے ذریعے قدرتی مصنوعات، بائیو ٹیکنالوجی، مالیکیولر، سیل بائیولوجی اور روایتی ادویات کے شعبوں میں تحقیق اور ترقی میں تعاون کو فروغ دینے کیلئے مفاہمت کی یادداشت پر دستخط کرنے کیلئے 27 اپریل کو اسلام آباد میں کامسٹیک سیکرٹریٹ کا دورہ کرے گا۔
مفاہمتی یادداشت پر دستخط سے چین اور او آئی سی کے رکن ممالک کے درمیان علمی اور تحقیقی اقدامات کو مضبوط بنانے میں مدد ملے گی۔ دستخطی تقریب کے موقع پر اس موضوع پر سائنسدانوں اور چین میں دواسازی کی صنعتوں کے نمائندوں کی اہم بات چیت بھی ہوگی۔