فلم جوائے لینڈ کو عالمی ایوارڈ ملنا ناقابل یقین لمحہ : ملالہ

نیو یارک : نوبل انعام یافتہ ملالہ یوسف زئی نے کہا ہے کہ پاکستانی فلم جوائے لینڈ کو بیسٹ انٹرنیشنل فلم ایوارڈ کا ملنا ایک ناقابل یقین لمحہ ہے۔ملالہ یوسف زئی نے فوٹو اینڈ ویڈیو شیئرنگ ایپ پر انڈیپنڈنٹ سپرٹ ایوارڈز کی تقریب سے کچھ یادگار تصاویر اور ایک ویڈیو شیئر کی ہے۔

ویڈیو میں دیکھا جاسکتا ہے کہ ایوارڈ کی تقریب میں فلم جوائے لینڈ کیلئےبیسٹ انٹرنیشنل فلم ایوارڈ کا اعلان ہوتے ہی شرکا تالیاں بجاتے ہوئے کھڑے ہوکر فلم کی ٹیم کی حوصلہ افزائی کررہے ہیں جبکہ تصاویر میں ملالہ اپنی فلم کی ٹیم اور تقریب میں شریک دیگر لوگوں کیساتھ کیمرے کیلئے پوز دیتے ہوئے نظر آرہی ہیں۔

انہوں نے یہ تصاویر اور ویڈیوز شیئر کرتے ہوئے بیان میں لکھا کہ مجھے بہت فخر ہے کہ ہماری فلم جوائے لینڈ نے انڈیپنڈنٹ سپرٹ ایوارڈز میں بیسٹ انٹرنیشنل فلم ایوارڈ اپنے نام کیا ہے۔

یہ پاکستانی فنکاروں، فلم کے وژنری مصنف اور ہدایت کار کیلئے ایک ناقابل یقین لمحہ ہے۔ مجھے بہت سارے پرانے اور نئے دوستوں کو دیکھ کر اور انکے کام کی حوصلہ افرائی کرنے کیلئے اس تقریب میں شرکت کرنا بہت اچھا لگا۔

ملالہ یوسفزئی نے اپنی پوسٹ کے آخر میں انڈیپنڈنٹ سپرٹ ایوارڈز جیتنے اور نامزد ہونیوالوں کو مبارکباد بھی دی۔