امارات میں دفاعی صنعت کی نمائش،اربوں درہم مالیت کے معاہدے

ابوظہبی: متحدہ عرب امارات(یواے ای)نےابوظہبی میں منعقدہ دفاعی صنعت کی بین الاقوامی نمائش کے دوسرے روز 8.14ارب درہم مالیت کے دفاعی معاہدوں پر دست خط کردیئے ،غیرملکی خبررساں ادارے کے مطابق ابوظہبی کی دفاعی فرم ایج نے، جس کے اثاثوں کی مالیت گذشتہ سال قریبا 5 ارب ڈالر تھی،سب سے بڑا معاہدہ اپنے ماتحت ادارے ہالکون کے لیے کیا ہے۔

اس کے تحت ہالکون کو ڈیزرٹ اسٹنگ پی 5 سسٹم مہیا کرنے کے لیے 4.7 ارب درہم کا ٹھیکاملا ہے۔ ہالکون نے اپنے ہنٹرسسٹم کے لیے 1.1 ارب درہم کے معاہدے پر بھی دست خط کیے ۔متحدہ عرب امارات نے مقامی کمپنیوں کے ساتھ 7.6 ارب درہم مالیت کے معاہدے کیے ہیں جبکہ بین الاقوامی کمپنیوں کے ساتھ اس کے معاہدوں کی مالیت صرف 54 کروڑ30 لاکھ درہم تھی۔

یہ معاہدے اس سال کی بین الاقوامی دفاعی نمائش (آئی ڈی ای ایکس)میں غیر ملکی کمپنیوں کی بھاری موجودگی کے باوجود ہوئے ہیں۔اس میں امریکااور یورپ کی بڑی کمپنیاں بھی شریک ہیں۔ایج کے ایک اور ماتحت ادارے ایڈاسی نے اپنے شیڈو سسٹم کے لیے 1.33 ارب درہم کا معاہدہ کیا ۔ایج کے چیئرمین فیصل البنائی نے خبر رساں ادارے کو بتایا کہ ہم نے گذشتہ سال مجموعی طور پر 5 ارب ڈالر مالیت کے آرڈرز بک کیے تھے۔اس کے علاوہ نو یا دس ممالک کے لیے ایک ارب چالیس کروڑ ڈالر مالیت کے برآمدی آرڈر تھے۔