بھارت : علیحدگی پسند جنگجو اہلکار کو قتل کرکے جیل سے فرار

ایٹانگر: بھارتی ریاست ارونا چل پردیش میں ناگا علیحدگی پسند تنظیم کے دو گوریلا جنگجو ترپ ضلع کی جیل کو توڑ کر فرار ہونے میں کامیاب ہوگئے۔

بھارتی میڈیا کے مطابق جیل میں ڈیوٹی پر مامور اہلکاروں نے جنگجووں کو روکنے کی کوشش کی تاہم جنگجو ایک پولیس اہلکار کو قتل اور متعدد کو زخمی کرکے جیل سے بھاگ گئے۔جیل توڑ کر فرار ہونے والے جنگجووں کی شناخت روکیش ہومچا اور ٹپتو کٹنیا کے نام سے ہوئی ہے۔

ان دونوں کو پولیس مقابلے میں حراست میں لیا گیا تھا۔خیال رہے کہ بھارتی ریاست ارونا چل پردیش میں پارٹی ’’نیشنل سوشلسٹ کونسل آف ناگالینڈ ‘‘ اپنی الگ ریاست بنانے کے لیے مسلح جدوجہد کر رہی ہے۔تاحال بھارتی فوج اور قانون نافذ کرنے والے دیگر ادارے کئی مشترکہ مہمات کرنے کے باجود علیحدگی پسندوں کو شکست دینے میں ناکام رہی ہے۔بھارت میں غیر منصفانہ وسائل کی تقسیم اور ملکی دولت اشرافیہ تک محدود رہنے کے باعث غربت میں اضافے کی وجہ سے کئی ریاستوں میں علیحدگی پسند تنظیمیں اپنے حق کے لیے عسکری جدوجہد کر رہی ہیں۔