’’حج کی اجازت دی جائے‘‘: پیدل مکہ جانیوالے پاکستانی کی اپیل
Share
مکہ مکرمہ : عمرے کے لئے پیدل مکہ پہنچنے والے پاکستانی عثمان ارشد نے سعودی عرب اور پاکستانی حکومت سے اپیل کی ہے کہ انہیں حج کرنے کی اجازت دی جائے۔عثمان ارشد نے مکہ سے وٹس ایپ پر جوابات دیتے ہوئے کہاکہ میں نے عمرہ ادا کرلیا ہے تاہم حج کا بھی ارادہ ہے ۔
حج کیلئے حج کا پرمٹ چاہیے اور وہ دلانے میں پاکستانی حکومت اور سعودیہ میں پاکستانی ایمبیسی مدد کرے۔اس سوال پر کہ پیدل سفر پر کتنا خرچ آیا ہے تو انہوں نے کہا کہ مکمل ٹور کا خرچہ تقریباً 15 لاکھ روپے ہے ۔ مشکلات کا ذکر کرتے ہوئے عثمان ارشد نے کہا کہ موسم کے حوالے سے مشکلات تھیں ۔
جب سفر شروع کیا تھا تو کافی گرمی تھی اور پھر ایران میں کافی سردی اور جب امارات میں داخل ہوا تو پھر گرمی ہو چکی تھی۔ چھ ماہ 13 دن میں 5400 کلومیٹر طے کر کے مکہ پہنچا ہوں۔ میری دلی خواہش تھی کہ میں پیدل جا کر اﷲ کا گھر اور رسول اﷲ صلی اﷲ علیہ وآلہ وسلم کا روضہ مبارک دیکھوں۔ 2021 میں میں نے اوکاڑہ سے چائنہ بارڈر تک پرامن پاکستان کیلئے پیدل سفر کیا تھاجو کہ 1270 کلومیٹرز تھا اور 34 دن میں مکمل کیا تھا۔ اْس کے بعد میں نے حج کے پیدل سفر کا ارادہ کیا،مجھے اﷲ پر یقین تھا کہ وہ ہمت دے گا اور میں مکمل کر لوں گا۔