لبنان، ملکی کرنسی بدحال، اشیائے صرف ڈالر میں فروخت

بیروت: لبنان کی سپر مارکیٹس میں درآمد شدہ اشیا ڈالر میں فروخت ہونے لگیں۔ یہ اقدام وزارتِ معیشت کی طرف سے کیا گیا ہے۔ تاکہ قیمتوں میں اضافے کو روکا جاسکے۔

میڈیارپورٹس کے مطابق لبنان میں شدید مہنگائی کی وجہ سے غیر یقینی صورتحال ہے۔ سپر مارکیٹس کو حکم دیا گیا ہے کہ کسی بھی چیز کی قیمت لبنانی پائونڈ کے علاوہ ڈالر میں بھی آویزاں کی جائے تاکہ صارف کو اصل قدر معلوم ہوسکے۔ ایک امریکی ڈالر کی قدر 89 ہزار لبنانی پانڈ ہے۔

دارالحکومت بیروت کی سپر مارکیٹ نے عملا ٹی وی اسکرین لگا کر ڈالر سے لبنانی پانڈ کے ریٹ آویزاں کر دئیے ہیں۔

صارفین کے پاس اب یہ سہولت ہوگی کہ وہ ڈالر میں ادائیگی کرسکیں۔ ایک کلو مرغی 6 ڈالر، ٹوٹھ پیسٹ ساڑھے 5 ڈالر، مکئی کاٹن سوا ایک ڈالر، تین کلو چاول 5 ڈالر 70 سینٹ میں دستیاب ہیں۔یہی رقم اگر لبنانی پانڈ میں دیکھی جائے تو لاکھوں بنتی ہے۔

نگران وزیر معیشت امین سلام نے کہا کہ یہ اقدام مسئلے کا حل تو نہیں لیکن اس سے روز مرہ اشیا کی بڑھتی گھٹتی قیمتوں کے اثرات سے محفوظ رہا جاسکتا ہے۔

یاد رہے کہ لبنان میں 2019 سے بدترین معاشی بحران جاری ہے، مقامی کرنسی ڈالر کے مقابلے میں زوال پذیر ہے۔