پی ایس ایل8 کی ٹیم کا اعلان، شاہین کپتان، بابر، رضوان بھی شامل

لاہور: پاکستان سپر لیگ کے اختتام کے بعد پاکستان کرکٹ بورڈ نے ٹیم آف دی پی ایس ایل 8 کا اعلان کردیا، لاہور قلندرز کے کپتان شاہین شاہ آفریدی کو ٹیم کا کپتان نامزد کردیا۔ پاکستان کرکٹ بورڈ (پی سی بی) کی جانب سے جاری کردہ اعلامیے میں پی ایس ایل ایٹ کیلئے 12 رکنی ٹیم کا اعلان کیا۔

سکواڈ میں ملتان سلطانز کے 5 ،پشاور زلمی کے 3، لاہور قلندرز کے 2 جبکہ اسلام آباد یونائیٹڈ اور کراچی کنگز کا ایک ایک کھلاڑی شامل ہے۔ ملتان سلطانز کے محمد رضوان، رائیلی روسو، کیرن پولارڈ،عباس آفریدی اور احسان اللہ، پشاور زلمی کے بابراعظم، محمد حارث، صائم ایوب، لاہور قلندرز کے شاہین شاہ آفریدی اور راشد خان، اسلام آباد یونائیٹڈ کے اعظم خان اور کراچی کنگز کے عماد وسیم ٹیم کا حصہ ہیں۔

صائم ایوب 12 ویں کھلاڑی کی حیثیت سے ٹیم میں شامل ہیں جبکہ کوئٹہ گلیڈی ایٹرز کا کوئی کھلاڑی سکواڈ میں شامل نہیں ہے۔ ٹیم آف دی پی ایس ایل کا انتخابات چیف سلیکٹر پی سی بی ہارون رشید ، بازید خان، ڈیرن گنگا، نک نائٹ اور ثنا میر پر مشتمل خود مختار پینل نے کیا ہے جس میں کھلاڑیوں کی فارم، کارکردگی اور ماڈرن ڈے کرکٹ کو سامنے رکھ گیا۔