پاک افغان ٹی 20 سیریز، عماد، اعظم ، اسامہ میر کے قومی ٹیم میں شامل ہونیکا امکان

لاہور: پاکستان اور افغانستان کے درمیان ٹی ٹوئنٹی سیریز کا اعلان آئندہ کچھ روز میں کردیا جائے گا۔

ذرائع کے مطابق پاکستان اور افغانستان بورڈز کے درمیان ٹی ٹوئنٹی سیریز کے معاملات حتمی مرحلے میں داخل ہوگئے ہیں اور اگلے چند روز میں تین ٹی ٹونٹی میچز کی سیریز کے شیڈول کا اعلان کر دیا جائے گا۔

ذرائع کا بتانا ہے کہ تین ٹی ٹونٹی میچز کی سیریز شارجہ میں کھیلی جائے گی، پاکستان ٹیم 23 مارچ کو متحدہ عرب امارات روانہ ہو گی۔

ٹی ٹونٹی میچز کی سیریز ایک ہفتے کے دوران مکمل کر لی جائے گی۔بتایا جارہا ہے کہ دو ٹی ٹونٹی میچز بیک ٹو بیک کھیلے جائیں گے۔

اس کے علاوہ قومی سلیکشن کمیٹی نے سکواڈ کے لیے مشاورت بھی شروع کر رکھی ہے۔ذرائع کے مطابق ٹی ٹونٹی ٹیم میں کچھ نئے چہروں کو شامل کرنے کا امکان ہے جب کہ بعض کو آرام دیا جا سکتا ہے۔ آل راونڈر عماد وسیم ، اعظم خان اور اسامہ میر کے ٹی ٹونٹی سکواڈ میں شامل کیے جانے کے قوی امکانات ہیں۔ ذرائع کا کہنا ہے کہ افغانستان کے خلاف سیریز میں عبوری کوچنگ سٹاف ذمہ داریاں نبھائے گا۔